ჩქაროსნული მაგისტრალის 27 მონაკვეთზე სადაც საგზაო შემთხვევები ხშირად ხდება, სამინისტრო €16 მილიონის სამუშაოებს ჩაატარებს
- ეკონომიკა
- ნოემბერი 5, 2025
- 82
აღმოსავლეთ-დასავლეთის ჩქაროსნულ მაგისტრალზე და მის მიმდებარედ, 2 კმ-ის რადიუსში, არსებული საგზაო-სატრანსპორტო შემთხვევების მაღალი კონცენტრაციის ადგილების (ე.წ. შავი წერტილების) აღმოფხვრისა და გაუმჯობესების მიზნით, გამოცხადდა საერთაშორისო ტენდერი – ამის შესახებ ინფორმაციას ინფრასტრუქტურის სამინისტრო ავრცელებს.
პროექტის ფარგლებში, აღმოსავლეთ-დასავლეთის მაგისტრალის 27 მონაკვეთზე განხორციელდება საგზაო მოძრაობის გაუმჯობესებისთვის საჭირო ინფრასტრუქტურული ღონისძიებები, მათ შორის: ლითონის მრუდხაზოვანი ძელების მონტაჟი; წრიული მოძრაობებისა და უსაფრთხოების კუნძულების მოწყობა; ამაღლებული ქვეითთა გადასასვლელებისა და ტროტუარების მოწყობა; საგზაო ნიშნებისა და ჰორიზონტალური მონიშვნის განახლება და სხვა სამუშაოები.
პროექტზე საერთაშორისო ტენდერი გამოცხადდა და ის ორ ლოტს მოიცავს. პირველ ლოტზე კომპანიებმა უნდა წარადგინონ ბოლო 3 წლის განმავლობაში არანაკლებ 6.5 მილიონი ევროს საგზაო სამუშაოების ჩატარების გამოცდილება, მეორე ლოტზე კი მინიმალური გამოცდილების მოთხოვნა 3 მილიონი ევროა.
პროექტი ფინანსდება ევროკავშირის მიერ გამოყოფილი გრანტით, რომლის ადმინისტრირებას ახორციელებს ევროპის საინვესტიციო ბანკი (EIB).
კომპანიებს 2025 წლის 3 დეკემბრამდე შეეძლებათ წინადადებების წარდგენა.
პროექტის აღწერასა და სატენდერო დოკუმენტაციაში არაა მითითებული უშუალოდ რა ლოკაციებზე იგეგმება აღნიშნული სამუშაოების ჩატარება.
